【細漢的囡仔歌】     （台文／附華文譯寫）

 

    「拄天拄地，鱟桸拄飯篱，鼎崁仔拄鼎摖，頭磕五筋膎，雞仔暗暗，掠起來崁。」這是阮細漢定定耍，一項趣味囡仔耍的唸謠。

 

    四五个囡仔，其中一个倒手伸出，五指開開，手心向下，賰的囡仔用倒手或者是正手的二指拄踮彼个囡仔的手心。逐家做伙唸：「拄天拄地，鱟桸拄飯篱，鼎崁仔拄鼎摖，頭磕五筋膎，雞仔暗暗，掠起來崁…」。當唸到「掠起來崁」的時陣，原本展（thián）開的手雄雄合起來掠指頭仔。準若拄咧手心的二指勼了傷慢，去夆（hông）掠著，就輸矣，換伊來掠別人。

 

〔註〕鱟桸hāu-hia：用鱟殼做成的瓢子（參見圖1、圖2）。飯篱pn̄g-lē：飯杓（參見圖3）。鼎崁tiánn-khàm：鍋蓋。鼎摖tiánn-tshè：鍋刷（參見圖4）。磕kháp：用硬物扣擊。五筋膎gōo-kin-kê：手掌反扣，突出的指關節。二指jī-tsáinn：食指。勼kiu：縮回去。

 

----（華文譯寫）----

 

【幼年的童謠】

 

    「頂著天，頂著地，瓢子頂飯杓，鍋蓋頂鍋刷，（大人要用）手指敲頭蓋了，（快趁）小雞仔看不清，抓到雞籠蓋起來。」這是我小時候常常玩，一項有趣遊戲的唸詞。

 

    四五个小孩，其中一個伸出左手，打開五指，手心向下，其餘的小孩，左手或右手食指頂著那個小孩的手掌心。大家一起唸著：「頂著天，頂著地，瓢子頂飯杓，鍋蓋頂鍋刷，（大人要用）手指敲頭蓋了，（快趁）小雞仔看不清，抓到雞籠蓋起來…」當唸到「抓到雞籠裡」的時候，本來張開的手猛地合起來抓手指頭。如果頂在掌心的食指抽離太慢，被抓到，就輸了，輪到他要抓別人。